政情：受惠「佔中」豐騷偷笑

港鐵平均客量升12%

港鐵早前公布，自九月廿八日佔領行動開始以來，每日平均客量升幅達一成二，當中港島線等三條傳統路線最熱鬧，繁忙時間班次接近飽和，加無可加。單係十月三日當天已錄得五百八十萬客量，多出七十萬人次，真係收錢收到手軟。

但其實港鐵多項鐵路工程連環爆出延誤超支醜聞，佔領前已令全城嘩然，其中淨係高鐵香港段工程就超支六十五億元，令總工程開支飆升至逾七百一十五億元。上月底，港鐵獨立董事委員會公布高鐵香港段工程延誤第二份調查報告，講到明高鐵有機會無法在一七年通車，同埋工程費可能進一步超支。

照計報告出爐後應該全城鬧爆，之但係報告公布當日撞正佔領行動「滿月」，新聞焦點輕易畀佔領轉移，錢果豐又一次成功避過火頭。

張炳良亦避過炮轟

除了錢果豐之外，運輸及房屋局局長張炳良可能都感謝佔領搞手，事關除咗多項鐵路一再延誤，連國家級重點工程港珠澳大橋都爆大鑊，張炳良日前都焗住認衰，披露大橋香港口岸將超支高達五十億元，可謂屋漏偏逢連夜雨。如果係以前，張炳良實成為議員及各界炮轟對象，但學聯最近計劃北上向中央表達政改的進展，又成功蓋過部分焦點。大膽講一句，如果問有冇人唔想佔領行動快啲結束，恐怕錢果豐及張炳良會舉手囉！