中環出更：蔣麗芸：港制度遠勝西方國家
佔領行動持續多時，學生代表留守佔領區，話要為港人爭取同西方國家一樣嘅民主制度。立法會議員蔣麗芸（阿Ann）尋日喺社交網站發表題為「不用你們代表，只要你們回家就好了！」嘅文章，透露自己喺剛過去嘅暑假走訪美國、加拿大同澳洲各地近十個不同大小嘅議會，深入了解三個國家嘅民主進程，唔使學生幫佢哋爭取西方式民主咁話。
阿Ann話，雖然西方國家同香港一樣擁有民主自由、人權同法治，但香港喺財政制度、金融、貿易自由等方面卻遠遠超前呢啲國家，就算係西方社會一直引以自豪嘅福利制度，亦唔見得比香港完善。例如雖然美國有退休金福利，但鑑於當地人口老化情況嚴重，供款嘅人愈來愈少，但攞退休金嘅人愈來愈多，令美國退休基金隨時乾塘，唔似得香港咁有個人強積金、長者生活津貼等退休保障。
指佔領破壞現有優勢
阿Ann又話，有民主選舉未必會令香港變得更好，但佔領行動就一定會破壞現有優勢，認為港人為「穩陣」起見，應該支持循序漸進嘅選舉制度，又呼籲學生快啲撤離各佔領區，唔好再豪言要香港實行西方民主喎！
卓妮