中環出更：龔仁心帶隊行山撐保育
秋高氣爽，又係行山嘅好時節。尋日華懋集團舉辦第四屆華懋行，華懋慈善基金主席龔仁心及太太劉元春揸住行山拐杖，同一眾名人漫步大潭郊野公園。龔仁心姊姊龔中心及妹妹龔因心亦有現身，仲同嘉賓及參加者一同穿上綠色T恤，唔使多講，佢哋梗係想帶出環保訊息喇！不過今次活動得益對象都幾特別，就係畀海洋公園用於支持又名「飛蛙」嘅「越南海倫樹蛙」保育研究。
講起做運動，龔仁心話，自己中學時好鍾意游水，仲係游蛙式，參加過唔少市級嘅游泳比賽添！不過依家佢做運動就唔係游水，而係同太太行山欣賞風景。當日慈善步行之前，佢仲先由陽明山莊行去起步點當熱身。
周肇平憶馬國行山之苦
當日一齊行山嘅仲有香港金牌田徑項目傷健運動員蘇樺偉、香港大學副校長周肇平等人。周肇平話，閒時會去唔同地方行山，當中行過最辛苦嘅莫過於馬來西亞沙巴嘅神山。記得當時差唔多每一小時就落一次雨，舉步維艱。
食物及衞生局局長高永文都有到場，佢在台上主禮時，喺衫袋掏出一支蚊怕水，笑笑口話自己有職業病，要提醒大家做足防蚊措施，預防登革熱咁話。
高永文行落台之後，仲幫龔中心等主禮嘉賓噴手添！儀式完結後，高永文被市民捉住合照，不遠處突然有把聲音話：「局長可唔可以同我影張相？」眾人擰轉頭一望，竟然係環境局局長黃錦星及其太太梁素雲咁啱行過，三個人隨後即興行咗一段路，認真有緣。
卓妮