政情：梁卓偉叫世姪咪讀醫
香港大學醫學院院長梁卓偉（Gabriel）唔止做過高官，仲係港大醫學院歷來最年輕嘅院長，做醫生做到咁有成就，當然唔少人都想向佢請教成功秘訣。Gabriel坦言確有唔少朋友問佢意見，但佢經常反勸年輕人唔好讀醫科，認真搞笑。
做佢學生要先學跌
Gabriel自爆話，好多朋友經常會帶埋子女同佢一齊食餐飯，希望佢醒幾招畀啲世姪。一餐飯閒閒地兩小時，點知Gabriel就不斷叫人唔好讀醫，一輪嘴話好辛苦，唔係睇電視咁，冇程至美（電視劇《妙手仁心》男主角）喎，搞到佢啲朋友唔知好嬲定好笑，鬧佢倒自己米。
Gabriel就話係一番苦心，事關讀醫科嘅成績一定極標青，可能十幾年人生都順風順水，跌都無跌過。但佢覺得一個人愈遲遇到挫敗就愈難起番身，所以要做佢學生就先要學吓點跌喎！咁佢有無跌過呢？佢就話，自己跌嗰陣仲喺國外，但就無透露點跌法同埋跌得有幾重囉！