佔領行動已持續一個月，各方開始盤點得與失。睇番多個泛民主派政黨，好多參與佔領嘅示威者都話今次佔領係「無大會」，唔少泛民落去佔領區，更加畀人批評係抽水，似乎進退失據。聽聞民主黨（白鴿黨）及公民黨（大狀黨）多個地區支部都面對好大壓力，其中大狀黨仲雪上加霜，皆因總策劃幹事黃晙（Ian）近日捲入涉嫌非禮風波，令明、後年嘅區議會和立法會選情更加嚴峻。
白鴿黨唔少選民較為溫和，用佔領方式爭取普選未必得到認同，加上佔領影響基層民生日深，白鴿黨地區支部陸續收到好多市民表明反佔中，而白鴿黨又唔夠激進泛民激，佔領者未必會投票畀佢哋，可謂「兩面不是人」。
至於大狀黨多個地區及政策支部近日陸續舉行改選，唔少人對Ian事件議論紛紛，認為建制派喺各級選舉或用Ian醜聞攻擊佢哋，成為選情負資產，質疑黨中央點解唔叫Ian辭職喎！