政情：痛心疾首 子代貪曾贖罪？
佔領行動曠日持久，之不過「你有你佔中，我有我遊埠」，「貪曾」前特首曾蔭權爵士於佔領行動以來，從未開腔反佔領同叫佔領人士回家。據聞貪曾繼續離港逍遙，懶理香港由三權分立陷入三權崩潰，但貪曾嘅長子曾慶衍夫婦就聯同一批醫生聯名登報，形容佔領行動如人體部分細胞不受制衡，過度生長，最終形成癌症，正侵蝕香港核心價值喎！曾慶衍夫婦忽然發聲，認真耐人尋味，唔知係咪趁機「代父贖罪」，為一直無話兒嘅貪曾「補鑊」？
五百多名醫生尋日聯名喺報章刊登頭版廣告，大字標題「痛心疾首」，副題為「醫者格言︰毋傷害（Do No Harm）」，並以一群熱愛香港嘅醫生署名，列舉五點回應佔領行動。
堵路如血管塞 危害香港
廣告開宗明義指「香港病了」，形容道路如人體血管，長期阻塞。必然造成傷害，而佔領行動持續數周，已嚴重影響民生、破壞法治及撕裂香港。
廣告強調，民主健康發展建基於法治，同時民主社會接受多元意見，尊重個人自主權，個別人士或團體不應以市民或業界代表自居，誤導社會，促請佔領人士立即離開道路，用合理、和平同合法手段爭取訴求，而作為醫生會繼續緊守崗位，支持警方專業執法。
疑「大義滅親」 抗議父懶理
翻查五百多名有份聯名登報嘅名單，發現相對貪曾於佔領行動以來粒聲唔出，身為貪曾長子嘅瑪麗醫院外科副顧問醫生曾慶衍同太太莫蔚淇都榜上有名，有分析指曾慶衍夫婦此舉客觀效果有兩個，一係「大義滅親」，連兒子都對身為父親嘅貪曾隻字無回應佔領行動作無聲抗議，另一可能係曾慶衍自知貪曾貪盡海陸空、歎盡省港澳嘅醜聞纏身，所以唔方便現身「指指點點」，惟有趁機「代父贖罪」表態反佔領嘞。
除此以外，唔少同政界有關連嘅醫學界中人都有份聯名登報，包括食物及衞生局局長高永文太太江孟儀、港大前校長徐立之胞弟徐成之、港大學者羅致光嘅胞兄羅致廉以及平等機會委員會主席周一嶽嘅胞兄周一彪等。