政情:肥亨勸顧明均領浸大博士

前商務及經濟發展局局長馬時亨(肥亨)早前獲嶺南大學頒發榮譽博士學位,點知遭到學生「柴台」,結果獲浸會大學頒發榮譽博士學位嘅商人顧明均極度不滿,公開拒絕接受浸大殊榮。

「為當日嶺大生傷心」

肥亨尋日話,知道件事後已經主動聯絡顧明均,勸佢接受浸大頒發學位,而且仲話現時唔應該被政治議題干預日常生活及工作。

肥亨重提嶺大舊事,似乎無乜唔開心,佢話反而覺得傷心多啲,覺得當日班嶺大學生嘅表現,似乎唔識得咩叫尊重,如果呢班學生日後投入職場,都唔知點算好。講起早前佢掛住睇電話而撞親隻眼,我哋趁機問候佢好番啲未,肥亨笑笑口話已經無事,事關佢太太用古法碌雞蛋消腫,估唔到咁使得。

講開又講,肥亨英文名叫阿Fred,查實政界好多時都撈亂其他人,因為民主黨李華明都係叫阿Fred,有人以為肥亨今年係民主黨籌款委員會主席,其實李華明先係。

第一手消息請下載on.cc東網iPhone/iPad/Android/Windows Phone Apps