寧煲韓劇拒赴宴
雖然示威者未佔到去富豪大宅，但全港多處堵路塞車，就算阿太司機係飛車手，亦無用武之地。有名太嬲爆話，由半山屋企去中環，平日只花廿五分鐘車程，佔領行動後，閒閒哋塞足個半鐘。咁塞法，真係人都癲。
所以阿太們近日都少咗出門，即使接到請帖都會睇地點先，若然鄰近示威區，打死都唔去，寧願匿喺屋企煲韓劇好過。影響所及，社交圈活動亦近乎零。
有公關公司老闆話，示威聲四起，試問大家邊有心情歌舞昇平；二來，路面大塞車，就算出動八人大轎接送，名人嘉賓都唔願出門。唔少品牌老闆見勢色唔對，紛紛將活動押後至十一、十二月，等佔領浪潮過咗先算。