佔領行動持續，警方與佔中示威者嘅衝突幾乎日日上演，獨立監察警方處理投訴委員會（監警會）自佔領開始收到嘅投訴個案之多，等於平時半年嘅數量。當大家都唔知點處理堆積如山嘅投訴、想召開特別會議商討對策時，上任咗四個月嘅監警會主席郭琳廣竟然玩失蹤，就連一班監警會成員用WhatsApp討論時，佢都潛晒水咁唔出聲。不過，正當有成員要「尋人」之際，郭琳廣尋晚先發新聞稿交代會跟進投訴。

據了解，佔領行動持續至今，監警會已經收到近五百宗對警方嘅投訴個案，係平時半年嘅數量。一班監警會委員一時間面對咁大量嘅投訴個案，頭都痕埋，加上呢兩日仲有示威者涉嫌被多名警員毆打事件，不論政治立場係左、中、右嘅監警會成員都好關注，聞說就連建制派嘅成員、大律師馬恩國都話要嚴肅處理。有成員就認為應該召開特別會議去商討點樣處理投訴，以免事隔耐咗，想搵番啲證據都難。

不過，唔止部分成員寧願去遊埠都唔開會，就連身為主席嘅郭琳廣都玩「潛水」。即使成員用WhatsApp群組討論，郭琳廣都一粒聲冇出過，好似隱咗形咁。本身係泛民主派立法會議員嘅梁繼昌同黃碧雲尋日就向郭琳廣及全體監警會成員發出公開信，要求郭琳廣立即召開緊急會議，並邀請埋警方代表出席，公開交代點樣跟進及處理有關涉嫌毆打事件，變相向郭琳廣發出「通緝令」，逼佢現身。

「通緝令」一出，郭琳廣尋晚透過監警會發新聞稿，話監警會已知悉投訴警察課正式收到警務人員涉嫌毆打示威者嘅相關投訴，由於該會現階段所掌握嘅資料僅限於傳媒報道，為咗日後該會審核有關投訴個案時嘅公正性，暫不宜作任何評論。

佢又話，該會一直有密切留意佔領行動嘅事態發展，並將所有由佔領行動衍生嘅投訴個案交由嚴重投訴個案委員會跟進喎。不過，至於點解班成員搵唔到佢，佢就無交代到喇。