早前有一名男子懷疑因服務合約糾紛闖入有線大廈斬人，原來立法會議員鍾樹根都受電訊公司服務合約困擾。尋日立法會討論到有關問題時，樹根就向其黨友、商務及經濟發展局局長蘇錦樑（Greg蘇）「問責」，批評Greg蘇話近年相關投訴一直減少嘅說法係「不盡不實」，又要求Greg蘇提供各大電訊商終止服務嘅流程，一於冇面畀。

Greg蘇尋日回應議員質詢時話，通訊辦一直都密切監察電訊市場及不時檢討規管措施，包括改善終止合約服務嘅安排，仲話近年嘅投訴已一直下降。

樹根聽完就直斥Greg蘇「不盡不實」，又話自己都係受害者，之前想終止電訊公司合約，點知門市職員話要佢等兩個鐘，質疑點解終止合約唔可以好似簽約時咁，喺街度簽個名、核實身份就搞掂。

原來樹根咁「」皆因佢同用開嘅家居電話連上網服務電訊商喺八月約滿，樹根就決定解除「死約」並逐個月續約。點知電訊商連續兩個月都話佢數據用量爆煲，佢就質疑係電訊商用陰招逼佢簽番「死約」，所以就決定終止服務。佢仲話如果電訊商再唔畀佢終止合約，佢就報警喎。

卓妮