中環出更：鬍鬚曾訪美 隱惡揚善？
佔中持續多日，開始踏入平靜局面，特區政府各官員都飛往外地公幹，好似財政司司長曾俊華（鬍鬚曾）就飛去美國六日，會見當地財金官員同商界領袖。鬍鬚曾話唔少美國人都好關心香港佔中情況，仲話佔中展示出香港社會高度文明同尊重言論自由喎。鬍鬚曾仲幫手解話，有份向美國人解釋班學生點解要佔領。佢應該係隱惡揚善而唔係紅皮白心啩？
「學生係時候離開街道」
鬍鬚曾喺網誌話，美國人除咗羨慕香港失業率低至百分之三點二同低稅率仍可達致收支平衡外，最關注就係佔中。根據鬍鬚曾講法，唔少美國人覺得今次佔中無人嚴重受傷、無人縱火、無人破壞，喺美國無乜可能出現，仲話係一國兩制嘅成功例子喎。
聽完美國人咁講，鬍鬚曾即刻「唱好佔中」，解釋學生示威訴求同背景，係源於希望爭取更開放嘅提名方式，又話學生訴求可以理解，所以先得到部分市民認同。現時雙方打緊仗，身為司長嘅鬍鬚曾咁講嘢，唔怕聽者有心咩？幸好佢最後有兜一兜，話示威同學已經透過佔領，將信念深深刻畫喺每個香港人腦海，係時候離開街道喇。