政情：佔中啟示 名媛捧網銷
一場堵塞路面嘅佔中行動令零售業慘遭池魚之殃，商戶莫不叫苦連天，亦令人反思做生意嘅模式，除咗開店舖之外，仲有冇更好嘅銷售渠道。早前仁愛堂副主席羅台秦（Louisa）同做美容保健品生意嘅好友鍾海燕（Heidi）相約茶敍，正在發展中港市場嘅Heidi話，香港租金昂貴，加上今次佔中帶來啟示，佢唔會考慮喺香港開店，反而睇好網上及直接銷售模式。
Heidi話，自從阿里巴巴喺美國上市，成為全球最大集資王之後，網絡經濟嘅發展價值及前景獲進一步肯定。香港嘅營商環境愈來愈不利零售業，相信喺佔中行動之後，網上銷售模式會更受落。Louisa都感贊同，佢預計零售行業類別會愈來愈少，除咗個別行業例如餐飲業仲需要維持實體店面，無法被取代之外，各行各業係咪一定要行零售店面呢條路，值得深思。