政情：KK抹汗 唔使用紙巾

尋日中午氣溫達攝氏三十二度，一班官員及議員在黃大仙廣場參與政府人員協會同工聯會（工記）舉辦嘅職安健嘉年華，烈日當空下個個大汗疊細汗。工記立法會議員黃國健（KK）就好醒目，早有準備帶咗條毛巾去抹汗，環保又唔驚甩到成面紙巾碎。佢話呢個習慣已經持續幾年，有時忙起上嚟走幾場，仲會帶兩條毛巾出街添！不過，同場嘅工記議員郭偉強同麥美娟就只用紙巾抹汗，KK笑笑口話要教訓佢哋喎。郭偉強就解釋話自己有敏感，毛巾抹完再抹會擴大敏感範圍，所以先焗住用紙巾啫。