舊樓僭建 屋署懶巡查
屋宇署巡查僭建被轟態度消極！「成個平台都僭建咗，好似一個大鐵籠咁，裝晒冷氣不特止，我見仲整咗支架放雜物，個單位肉眼都睇到勁殘舊，唔知穩唔穩陣！」盧先生指油麻地上海街有舊樓利用平台位置僭建單位，並以鐵皮及鐵枝支撐，外面更裝有多部冷氣，盧擔心僭建日久失修會不勝負荷，不滿一直未有部門跟進。
「要等市民投訴先處理」
屋宇署發言人表示，已派員視察，發現大廈一樓平台有僭建物，惟未有明顯危險。根據現行執法政策，上述僭建物屬優先取締類別，該署會按序發出清拆令，並先發信促請業主自行安排拆除該平台僭建物。
「呢個僭建物喺度已經好耐，原來屋宇署一直都唔知，要等市民主動投訴先去處理，究竟佢哋有無主動去舊樓巡吓？」盧先生指油麻地舊樓極多，僭建物觸目皆是，要求當局主動出擊清拆違建物。