廠商會青委帶特殊童遊迪園
中華廠商聯合會一眾青委會成員，早前資助東華三院徐展堂學校一班智障及特殊兒童去迪士尼樂園歡度一天，令他們夢想成真。青委副主席王詩雅（Celia）與東華總理李曠怡牽頭搞呢次同樂日，十多位青委成員包括張永鴻、翁國豪、羅程剛、徐詠琳齊支持。
眾人中午抵達迪士尼後，先食個快餐醫肚，充完電就排隊玩各項機動遊戲，人氣度極高嘅過山車、越礦飛車、旋轉木馬及3D米奇騷，都係必玩項目。話咁快，大家就打成一片。
Celia形容班小朋友好熱情，雖然語言表達能力唔強，卻不時主動幫班青委抹汗，又送上親吻。翁國豪就讚佢哋好大膽，初次玩過山車不但無尖叫，仲反安慰班青委話「哥哥，唔使驚，我喺度」，場面溫馨。臨走時，班小朋友扁晒嘴話唔捨得分手。Celia話，聖誕節會去院舍開派對，唱歌畀班小朋友聽都未定喎。