政情:收料站:警方冇水炮泛民做騷咁做

佔中在即,泛民主派早前就安排咗幾十人喺屯門接受水炮演練,雖然射到個個濕晒身,但由於水炮力度有限,似係玩水多過演練。其實用水炮車防暴喺外國的確常見,但有消息話泛民今次演習無用兼做騷,因為香港警方根本無水炮車,亦無打算購入水炮車,加上估計佔中人士會靜坐佔領中環,所以就算用水炮都射唔走啲人群。

其實最初先係社運界人士收到風,話警方會喺佔中期間出動水炮車,所以班泛民先搵部水車做演習。雖然水車威力低好多,但佢哋都話一試無妨,最終搞完大龍鳳濕晒身後,先至發現原來警方裝備中無水炮呢回事。

傳警方已借水車應付佔中

消息話,就算○五年香港世貿會議,韓農到港示威,警方都只係借調消防水車作定點噴射,同出動防暴水車係兩種級數。據聞警方近日已向消防處提出借用消防水車,以備應付佔中行動。

反而社運界人士遺忘咗警方年前曾經購入一批「聲波炮」,到底佔中之日會否大派用場?泛民又會否做足準備應對聲波炮呢?

第一手消息請下載on.cc東網iPhone/iPad/Android/Windows Phone Apps