泛民飯盒會今日開始換屆，由公民黨梁家傑接替民協馮檢基（阿基）出任召集人。阿基尋日同傳媒茶敍，分享過去一年來擔任召集人嘅點滴，期間仲提出泛民應該合組聯盟甚至大合併，為將來真正落實普選後成為執政黨做好準備喎。須知泛民近年愈來愈散、內訌不絕，講到香港落實真普選，更加不知要等到何年何月，唔知阿基真係咁大想頭，定係想用盡最後一日嘅召集人光環博出位，有咁大就講咁大呢？
阿基又話，做咗召集人一年，最大得着係同其他泛民議員熟落咗好多，事關佢過往唔做召集人嗰陣，成日掛住去做gym而好少開會，同其他議員都無乜兩句。
外界近來盛傳西貢區議員方國珊會加入民協，阿基就話兩人喺地區政策上合作無間，但就無傾過入黨問題。佢又笑言對方之前係建制派一員，突然加入泛民擔心會「害咗佢」，自己唔鍾意同人因選舉而結合，因為咁樣一定唔會長久。