政情：遊行遇閘 白鴿黨「佔總」
民主黨（白鴿黨）搶閘喺佔領中環行動前，變相佔領添馬艦政府總部？話說白鴿黨約十人尋日下午三時許，由金鐘海富中心行人天橋出發，欲遊行至俗稱「公民廣場」嘅政總東翼前地抗議坑渠油事件，唔知係咪因公民廣場重開後遇上嘅首次示威，一批政總當值保安嚴陣以待，一早喺前往公民廣場必經嘅扶手電梯率先「落閘」，唔畀佢哋落去請願，白鴿黨即時靜坐要求行政署交代，搞到好似忽然變相佔領政總數個小時。
險累梁耀忠淋雨
白鴿黨傍晚於立法會舉行記者會，有份參與示威嘅立法會議員胡志偉話，過往政黨團體於示威前只要知會相關政策局，均可安排喺公民廣場抗議同遞交請願信，但公民廣場加設圍欄後就話「冇此規矩」，批評此舉同「門常開」概念背道而馳，該黨六名議員會聯署去信行政署要求交代事件。
白鴿黨忽然變相佔領政總，仲意外影響埋路過想返立法會嘅街工梁耀忠，當時佢遇上扶手電梯「落閘」，擾攘一輪後才獲當值保安員放行，先可以唔駛淋雨，難怪佢事後表示強烈不滿，狠批行政署將政總變成監獄喎。