政情：陳雲生遭「錯字王」鎅橫額
屯門區議員陳雲生最近連環中招，遇着個「錯字王」鎅橫額同海報？陳雲生尋日喺社交網站上載多張海報被鎅嘅「災情」，其中有市民喺佢橫額寫上「一『當』（黨）專政冇包容」、「『起由』（豈有）此理」字眼，前後十一個字錯足三個，真係唔知好嬲定好笑。
陳雲生透露，自己於七月下旬就壹傳媒老闆肥佬黎嘅政治捐款醜聞向廉政公署舉報後，接連有人以利器鎅爛佢喺區內嘅大部分單張同海報，有關惡行近日更變本加厲，其議員辦事處整幅告示板都無一幸免，認為對方行為明顯有針對性而非純粹「細路仔百厭」。雖然損失只係一百幾十元，但佢認為唔可以向惡勢力低頭，決定報警處理。
（互聯網）