政情：大輝前途與政改綑綁
立法會工業界（第二）議員林大輝（大輝）有意於二○一六年立法會選舉轉戰直選嘅消息，喺政界已係公開秘密，近年仲同代表工商界嘅自由黨「行得好埋」。該黨現任新界東議員田北俊（田少）仲打晒開口牌，對外放風話願意排新界名單第二位幫大輝「抬轎」，保送佢入立會。話雖如此，大輝仍然未敢瞓身落注自由黨，尋日同傳媒聚會時仲故弄玄虛，突然將政改同自己前途綑綁埋一齊，自言要視乎政改係咪通過先作去向打算，一旦政改被否決，隨時連議員都唔做喎。
自由黨未獲「祝福」 拒加入
大輝要睇下政改係咪通過，先決定選唔選下屆立法會，理由係如果通過政改後嘅政治生態一定唔同，到時就會諗下用邊個平台發聲，而自由黨係其中一個機會，至於留守功能界別參選就唔係首選；相反，如果政改唔通過，大輝話分分鐘會揀唔玩，因為政改否決意味立法會局面同過往一樣，到時一定覺得意興闌珊，所以寧願唔玩好過。
有知情人士透露，大輝依家舉棋不定，底因係自由黨嘅前路未明朗化，如下屆立法會選舉時，操盤人完全當自由黨係透明，換言之無有關方面嘅「祝福」，咁大輝加入自由黨未必可以達到雙贏，所以都係睇定啲先落注。
形容否決政改如「斬晒手腳」
或者大輝都心郁郁想繼續議會生涯，佢尋日公開呼籲泛民切勿杯葛政改，反而應該利用泛民手上選票，向未來特首候選人「討價還價」，咁先發揮到最大作用，又形容否決政改同「斬晒手手腳腳」無乜分別。
除此以外，大輝都好緊張外國勢力係咪干預香港事務，尋日特登去信特首辦要求政府去信英國同美國駐港總領事提出抗議，重申政改係香港內部事務，其他國家不得干預。話時話大輝對此事咁上心，點解唔自己去信直接抗議，反而要兜大個圈去達到同一效果，呢個只有佢自己至知嘞。