中環出更：造人大計未完 楊華勇難遊日
日圓持續大幅貶值，跌至多年來新低，除咗日貨超市大減價吸引顧客掃貨外，亦有好多香港人想趁呢段時間去日本玩番轉。尋晚一個政商界要員雲集嘅酒會上，多位名人都話有意趁平去日本旅行。其中主人家中華總商會會長楊釗就強調，匯率低唔係重點，最緊要係自己想唔想去嗰個地方，如果唔鍾意，就算匯價跌到更低都未必吸引到佢。
不時去旅行嘅楊釗向卓妮表示，人生可以分為上下半場，上半場係為事業、家庭、財富及社會地位拚搏，佢已經完成咗一部分，係時候開始下半場，提升個人文化修養。所以佢選擇地方旅行，主要會考慮該處嘅文化同宗教背景，當然有時亦會趕潮流，好似近年佢就鍾意去南韓玩。楊釗又話，過往因為太專注工作，欠咗自己太多休息，亦忽略咗陪伴家人嘅時間，犧牲咗唔少到國外增廣見聞嘅機會，所以與家人旅行係一個好好嘅補償。
想去日本好耐嘅中總會董楊華勇（Johnny）就表示，由於生育大計尚未完工，所有未必可以去住。已有兩個小朋友嘅Johnny，並唔抗拒繼續追多個B，擔心日本嘅殘留輻射會有負面影響。加上佢小朋友先得四個月大，帶住佢周圍去未係咁方便，所以只係得個恨字，惟有食住日本嘢頂住檔先啦。
同場嘅商務及經濟發展局副局長梁敬國就話，自己囡囡已經十二歲，對上一次去日本有成十年前，加上今次日圓大跌，所以覺得好吸引！
周雯玲料日圓跌勢持續
身兼中總會董同中華廠商聯合會青委名譽主席嘅周雯玲（Irene），早前一班廠商會青委一齊去咗台灣玩，佢並無跟埋去，原來係因為佢填表時，先發現自己個護照仲有一月就到期，惟有好失望咁獨留香港。Irene直言見到日圓係咁跌，本來都心思思好想去，但做開投資銀行嘅佢，覺得日圓兌美元仲有下跌空間，隨時可返番去十年前嘅兌120水平，所以都係等佢慢慢搞番掂本護照，先至再計劃行程都未遲。
卓妮