政情：鮑誠業防盜 寓所裝椒霧
本港各區豪宅爆竊不斷，早前仁濟醫院前總理鮑誠業（Sammy）的西貢寓所亦不幸被盜賊光顧，損失逾七十萬元財物。事後Sammy將屋企的防盜裝備全面升級，除咗布下天羅地網的防盜警鐘及攝錄機之外，最有趣係竟然安裝胡椒噴霧，一旦警鐘大作，裝置即自動噴出胡椒，令賊人知難而退。
獨立屋曾遇竊 妻嗌上樓
Sammy話，當保安公司向佢推介安裝胡椒噴霧時，佢都係第一次聽有啲咁嘅嘢，估唔到警方控制示威場面、維持公眾秩序時使用嘅胡椒噴霧，亦可以用於住宅，但據聞丹麥已經用咗廿幾年，香港大約引入咗兩年。安裝後佢曾經試用，結果令人難受的味道要成個鐘先至散去，相信抗賊成效唔錯。
講起早前屋企被爆竊，Sammy好淡定，反而太太事後好唔安樂，嚷着要搬屋上樓，唔想住獨立屋。今次Sammy畀足心機加強保安，相信應該會安全好多。