政情：缺席遊行 發叔歐遊太操勞？
鄉議局主席劉皇發上個月因為要「聽醫生意見」而缺席反佔中遊行，但原來佢非常好精力，七月先遠赴英國出席外孫女嘅大學畢業禮，仲同屋企人暢遊英國、冰島二十日，至七月底先返港，莫非因此而操勞過度以致缺席遊行？
英國探外孫女 冰島睇火山
發叔尋日出席新界社團聯會活動時精神奕奕，仲周圍同人打牙骹。發叔透露，七月同一家十幾口去英國探外孫女兼抖暑度假，但佢笑言唔知孫女讀邊間大學，「你知（大學）都係啲英文名啦！」淨係知孫女讀設計相關嘅課程，仲打算讀埋碩士添。佢又話，都唔知孫女讀乜嘢，反正佢負責交學費就得喇！
除咗出席外孫女畢業禮，發叔仲喺乖女安排下，順道去探吓啲鄉里，遊覽大笨鐘、大英博物館等著名地標，期間仲去冰島睇火山，玩多六日叉足電先返港。