中環出更：梁福元「蛋糕頭」 淋冰都咁挺
淋冰挑戰席捲香港政壇，好多政界中人已經爭住挑戰，不過論娛樂性，又點少得元朗區區議員梁福元呢。福元哥嘅「蛋糕頭」以又硬又挺見稱，聞名港九新界。前日輪到福元哥被點名進行冰桶挑戰，結果冰水難敵「蛋糕頭」，福元哥密度極高嘅髮型，就好似擋風玻璃咁跣走晒啲水，而且淋冰後掃一掃就堅挺番，呢啲咪叫真正硬漢子囉。
自爆「天生咁硬」
前日香港肌健協會喺元朗舉行淋冰挑戰，因為之前元朗區區議員黃卓健點名挑戰福元哥，福元哥當然唔會走數。前日個活動本來已經籌到六千幾蚊，福元哥話好頭好尾，即場拎多四張金牛出嚟，令善款變成一萬蚊。不過都未算高潮戲肉，當福元哥真正淋冰時，大家先見識到佢嘅頭髮違反物理定律，淋水淋極都好堅挺，在場觀眾無不驚訝，情況就同西甲足球明星C朗早前淋冰一樣。
事後福元哥自爆，話啲頭髮「天生咁硬」，而且生長速度驚人，細細個開始就要每兩星期剪一次頭髮，如果要保持呢個「蛋糕頭」，仲要三星期電一次至得。聽聞淋冰當日福元哥仲有少少感冒，不過佢話為慈善無辦法，惟有頂硬上啦。
卓妮