探射燈：迎各項社會挑戰 學者寄厚望
多位澳門學者均認為崔世安表現稱職，在任內落實多項政策，對澳門市民「算係交到功課」，並期望他若成功連任，能兌現選舉承諾，迎接各項社會挑戰。
順應市民訴求 興建「離島醫院」
「佢呢四年幾都幾照顧市民，至少真係有做到嘢。」澳門科技大學人文藝術學院助理教授譚志強認為，崔世安在任內期間，在公共房屋、交通、醫療各方面，均有逐步兌現承諾，「喺佢之前，澳門一間公屋都無起過，雖然未實現晒『一萬九』，但至少落成咗部分公屋，算係有找數。」他指，崔於任內落實興建位於路環的綜合大型醫院「離島醫院」，是回應了澳門市民對醫療公共設施的訴求。
而澳門公共政策學會會長陳卓華則認為，崔世安過往的表現「中規中矩」，不過認同他在公共政策貢獻不少，「佢喺任內增加咗唔少老人福利，依家每個年滿六十五歲嘅澳門長者，連同敬老金、養老金及公積金等多項福利，每年有八萬幾蚊津貼，對佢哋嚟講算係唔錯。」