政情：王淑筠謀搞社企助釋囚
香港青年聯會會董王淑筠（Diana）接手家族珠寶生意之餘，仲膽粗粗代理意大利知名朱古力品牌，幾年間搞得有聲有色，第三間分店開張才兩個月，佢已開始物色更大的店面，打算開第四間分店。初次創業就咁順利，激發Diana高昂鬥志，佢心思思想與朋友合作成立一間社企幫釋囚重返社會。
不過，社會上已有好多善心者向更生人士伸出援手，Diana就話想搞搞新意思，唔學人哋做餐廳食肆。咁究竟搞邊瓣？小妮子話要賣關子先，以免被抄橋喎！
兼任香港中小型企業總商會零售品牌委員會主席嘅Diana，遲啲將開講座與一班企業二、三代探討承傳之道，皆因如何喺守業中創業係好多接班人嘅共同難題。講起佢打理間朱古力店嘅秘訣，Diana話，勇於創新嘅精神好重要，好似店中極受歡迎嘅雪糕，除咗由總公司入口傳統口味外，佢仲自創本地新口味，例如好有亞洲特色嘅榴槤味雪糕，佢仲將至愛嘅伯爵茶加入雪糕中，連某知名食家都讚好。