政情：Greg蘇耍大牌辣慶嫻姐
工聯會（工記）立法會議員陳婉嫻在暑假期間，請咗唔少問責官員落區，但據聞有位局長係點都請唔到嘅，呢位就係商務及經濟發展局局長蘇錦樑（Greg蘇）喇！有工記中人透露，嫻姐最近想在九龍城打造一條「潮州街」，打算請Greg蘇落區視察，但Greg蘇一直採取十問九唔應嘅態度，激嬲嫻姐同工記中人。不過，Greg蘇日前竟然去咗參觀經民聯位於沙田嘅惠食舍參觀，莫非佢同工記有仇？
僅派副局應酬工記
據工記中人透露，嫻姐早前趁暑假，邀請咗多位問責官員排住隊咁落區，首先有勞工及福利局局長張建宗幫長者砌家電，跟住有食物及衞生局局長高永文幫長者把脈、量血壓等，但就硬係請唔到Greg蘇，皆因Greg蘇唔係話唔得閒，就話好忙，所以當嫻姐上星期見到Greg蘇淋冰桶時，都不知幾嬲，仲大爆咗一句話：「Greg蘇得閒淋冰水，唔得閒見市民」喎。
照計嫻姐唔係「太后」，無理由一叫啲官員就要隨傳隨到嘅，但其實佢係為咗搞活地區本土經濟。話說嫻姐早就諗好全套計劃，以針對九龍城潮州人眾多，有意將當區打造條「潮州街」，於是想邀請Greg蘇落區視察，聽吓市民意見之餘，又叫身為潮州人嘅高永文帶Greg蘇周圍食潮州嘢。原本搞呢啲騷，議員同官員有機會曝光威水吓，絕對係雙贏，可惜Greg蘇有張好牌都唔識上。
其實Greg蘇嘅副手梁敬國早已應承嫻姐，去九龍東地段睇吓旅遊發展項目及本土經濟發展等設施，所以唔知係咪因為已有代表應酬嫻姐，所以Greg蘇就懶得去捧場。
親訪經民聯「惠食舍」
不過，Greg蘇把口話忙，但日前竟去咗參觀經民聯嘅惠食舍。咁樣厚此薄彼法，又難怪工記咁嬲嘅，再嬲啲可能要求政府發多幾個電視牌都唔奇呀。