中環出更:李偲嫣踩人力場爆罵戰

正義聯盟召集人李偲嫣的確係無處不在,佢尋日就去到人民力量(人力)立法會議員陳志全(慢必)位於沙田瀝源邨嘅辦事處外,抗議該黨喺港鐵早前借東鐵輾斃唐狗事件中抽政治水,破壞香港安定繁榮,實在不可接受咁話。雖然慢必間辦事處本來周六下午休息,但成員「快必」譚得志就特意去到現場恭迎李偲嫣。雙方於是各自攞住大聲公,隔住一條小巷,互相對罵。

嘈足半句鐘 苦了街坊

期間李偲嫣又抱住佢養嘅小狗,不斷叫口號,話「人民力量、無晒力量、漢奸力量」等等,又認為港鐵高層應該承擔責任,出來道歉,而且要成立培訓員工嘅機制喎。至於人力就專登造咗兩塊寫上「偲嫣帶得走,唯(惟)有六八九」嘅示威板,話用嚟恭迎李偲嫣,又話李偲嫣抱住隻狗去示威,難為狗隻,小狗隨時中暑都唔定喎。其實成件事已過咗近兩星期,依家舊事重提,仲要嘈足半個鐘頭,難為咗啲街坊囉!

卓妮

第一手消息請下載on.cc東網iPhone/iPad/Android/Windows Phone Apps