中環出更：小肥張夠體恤 下屬讚好
香港菁英會及新家園協會尋日早上喺奧海城舉辦家庭夥伴計劃啟動禮，菁英會常務副主席盧金榮（Wingco）、秘書長黃進達及有份協辦嘅陽光勵進會創會社長丁志威等人齊現身，勞工及福利局局長張建宗（小肥張）亦趕場去做主禮嘉賓。勞福局政治助理黎穎瑜（Jade）及新聞秘書Angela都有陪局長出席活動，但小肥張就容許兩人喺完騷後先同家人食晏短敍天倫，然後再趕下一場，難怪佢哋話小肥張好體諒。
有人話香港人情淡如水，小肥張就話，佢一向主張企業應該多啲人情味，只要僱主多啲體恤員工，員工一定會銘記於心，對公司更加忠誠用心，事關人心係肉做嘛。講講吓，佢提起前政助莫宜端喺任內接連生咗兩名小朋友，佢就成日叫莫宜端唔使吓吓返辦公室，因為今時今日科技進步，好多嘢可以用電腦處理。
好似尋日係周末家庭日，小肥張就畀Jade及Angela利用空檔同家人短敍食飯，幾個鐘後再會合趕下一場，佢話咁樣生活及工作先可以取得平衡喎！
盧金榮帶新移民遊香港
聽日就係全港中小學開學日，好多名人家長都鬆一口氣，唔使日日陪住小朋友。Wingco嘅細女今年升讀小一，佢話真正可以抖啖氣嘅係佢太太，因為今個暑假佢忙到飛起，好少陪小朋友。講番由新來港家庭及香港家庭配對嘅家庭夥伴計劃，Wingco話，同佢配對嘅新來港家庭由廣東來港一年幾，佢打算帶佢哋到香港各處行吓，等佢哋早啲認識香港，展開新生活。
卓妮