棋枱損壞 逾半年未修
「得閒想同啲老友記去捉吓象棋，點知張枱爛咗咁耐、穿埋窿都冇人整！」梁先生指葵盛東邨盛興樓有棋枱損壞多時，期間更有整塊棋盤鐵片脫落、露出已生銹鐵面，而鐵面甚至出現破洞。梁指除象棋枱損壞，附近地面亦有凹凸不平情況，「個凹位直頭放到個十蚊銀。」
一月已向管理公司反映
葵盛東邨物業服務辦事處發言人指出，七月下旬巡視時發現上址有兩張棋枱損壞及地面稍有不平，已即時訂製新的棋枱面及安排維修地面，工程預計可於八月底完成。
當區區議員周偉雄指自今年一月已向管理公司反映有關棋枱損壞事宜，惟一直未獲跟進，狠批房署將邨內事務外判予管理公司後即撒手不理，要房署加強監管，「房署外判咗畀管理公司之後似連責任都外判埋咁，係咪管理公司是但做到完約就得，唔使監管？」