政情：「強」為港把脈邊句真？
香港回歸十七年來，貧富懸殊問題未解決，樓價有升無跌，市民叫苦連天，行政會議前成員林奮強尋日又預言家上身為香港「把脈」，點出香港發展「三樽頸」所限，即土地不足、勞工不足同「關門閉島」心態，預言如果唔及時克服呢個障礙，本港勢將陷入「增長衰退」。但林奮強之後又話鋒一轉，預測本港原本嘅「黃金五年」，即一○年至今年，將延長至一六年，林奮強究竟葫蘆入面賣緊乜藥，唔知曾同佢共事嘅政府中人又知幾多呢？
籲改變「閉島」心態
香港黃金五十創辦人林奮強每隔一段時間，就會為香港「把脈」，佢尋日以「回顧及展望」為題舉行記招，預言本港有多個樽頸位要克服，其中一個係港人「關門閉島」嘅心態要改變，舉例指唔可以動輒以蝗蟲來形容個人遊旅客，不應以偏狹目光看待佢哋。佢建議本港旅遊業要做好硬件設施，歡迎旅客來港先啱，咁就可以推動服務業，促進經濟發展。
另外兩個樽頸分別係土地及勞工嚴重不足，林奮強建議由今年起每年輸入三千個外勞來港，按年增加一千個名額，以應付二○二○年起每年少二十萬勞動人口的問題。
唔贊成全民退保
林奮強其後連最近熱議嘅全民退休保障建議都要加把口評論，佢講到明唔贊成推行，又話呢種隨收隨付制度，會隨着退休人口超越納稅人口，導致破產收場。之後佢又再次力銷佢建議多時嘅關顧長者未來生活建議，包括增建九間公立醫院，新增一萬九千張床位，以及十八區建長者中心，令退休長者老有所依。
話時話，林奮強一時話香港發展「三樽頸」，一時又話「黃金五年」可以延長至一六年，究竟邊句先係佢嘅真心話，或者係解決問題嘅真正良方，呢個相信只有佢自己至知嘞！