政情：有相為證：黃浩神秘現身廉署半粒鐘
藝人徐淑敏嘅商人丈夫黃浩（Kenny），近年新聞多多。我哋尋日早上十點四十五分，又發現佢乘坐白色七人車，到達北角廉政公署總部。七人車駛入廉署上落客區後，就見到戴住副黑超、身穿黑色貼身T恤及深色牛仔褲嘅Kenny，與一名身穿西裝嘅男士一齊落車，步入廉署接待處登記。
期間見Kenny不斷咁四圍望，但當發現記者時，佢就同隨行男士一同急步走向廉署嘅落貨區，然後再急步行返入廉署大樓，然後上樓。大約二十五分鐘後，我哋就喺廉署落貨區見到之前載住Kenny同隨行男士嘅七人車，拉晒車上所有窗簾駛離現場，尾隨又有一架載住另一名穿着西裝男士嘅同款白色七人車護航。唔知Kenny去廉署搞咩呢？我哋昨日聯絡過佢，但至截稿前都無回應。