中環出更：社企便利店開張 孫國林做格價專家
恒基地產副主席李家傑創立嘅家園基金，前日喺荃灣福來邨成立第六家社企便利店，包括勞工及福利局局長張建宗（小肥張）、行政及立法會議員林健鋒（Jeffrey）及立法會議員梁君彥（Andrew）等政界人士齊去見證開幕儀式。Andrew話，便利店夠晒方便，但係同佢小時候嘅士多辦館相比，少咗啲人情味喎！
Andrew話，便利店係近二十年先至開到梗有一間喺左近，佢小時候只有士多辦館，仲成日有得試飲試食。試過有一次士多老闆請佢飲一啖Tonic Water（氣泡飲料），自此佢就愛上，到依家都仲成日飲添。
林健鋒自讚兒時可愛
Jeffrey都笑笑口話，佢小時候都算生得可愛，雜貨店老闆經常請佢食肚臍餅、煙仔餅。
講番間社企便利店開幕，恒基執行董事兼家園基金董事孫國林話，曾經有街坊幫襯買廁紙後，投訴佢哋賣得貴過大型超市，經調查後，原來係超市適逢周末大減價，於是佢哋亦即刻減價。自此之後，佢哋亦要緊貼市場，時刻格價，以確保便利店貨物價格貼近市民嘅購買力喎。
當日小肥張睇見便利店門口當眼位置擺咗好多罐豆豉鯪魚，就借機賣口乖話，睇見佢哋鎭店之寶豆豉鯪魚只賣十六個半，平過市面賣嘅廿一蚊，就知街坊一定受惠，睇嚟佢幾了解物價喎！
講到家園基金個名同另一家「新家園協會」好相似，孫國林爆料話，原本李家傑都對基金命名感猶疑，但後來佢向李游說話，恒基主席李兆基有兩個仔，一個叫李家傑，一個叫李家誠，咁「第三個仔」咪叫李家園囉，於是咁就講掂咗嘞。
卓妮