天秀墟「焗」趕客 「焗」商販蝕本

天水圍天秀墟門可羅雀,基層自力更生夢碎!墟市自去年營運至今一直被指「丁財兩不旺」,近日再有檔販指營運環境欠佳,酷熱天氣下場內氣溫更高逾三十四度,但降溫設施嚴重不足,導致人流稀疏、生意慘淡。區議員指問題早於天秀墟開幕時已存在,惟苦無資源解決;立法會議員認為事件反映政府未有提供充分支援,與原意協助基層就業的理念背道而馳。

「冷風機先得嗰幾部,啲雞蛋都熱到壞晒,開檔三個幾鐘先賺得嗰四個半,本來想出嚟做啲小生意幫輕下啲後生,點知連自己都搞唔掂!」在天秀墟售賣糧油雜貨的朱先生直指場內熱浪逼人,令市民卻步、人流稀少。至於售賣水培盆栽的馮先生亦大呻生意淡薄,高溫下盆栽亦快被「熱死」,惟至今未見改善措施,「啲汗多到就算飲幾支水都唔使去廁所,你話咁熱邊度會有人嚟買嘢?啲水溫太高又會熱死啲盆栽。其實應該加個天幕,陰啲就會多啲人嚟買嘢。」

戶外34℃ 冷風機僅五部

記者曾到墟市實地量度氣溫,發現戶外錄得逾攝氏三十四度高溫,檔內更高見三十五度,墟市雖加設五部冷風機,但因數量不足,採訪當日便目睹有檔販不滿冷氣機放置地點遠離檔位而跟管理人員發生爭執。

東華三院發言人稱,去年夏季已在天秀墟設置五部戶外水冷式冷風機,及至今年三月更種植樹身高逾八米的大葉喬木、安裝六十多把太陽傘及放置九十盆蒲葵植物,以達致降溫效果。對會否增設冷風機一事,發言人則未有回應。

政府已撥款改善遮蔭

民政事務總署發言人指,元朗民政處一直協調各政府部門協助天秀墟,政府亦向東華三院提供一次性撥款,以改善墟市遮蔭、降溫及綠化措施及增加電力。

「其實上年已經收到唔少商戶投訴,話個墟市咁熱、好難做生意,但係拖咗成年都冇咩改善,據我了解,依家根本冇足夠資源去整天幕。」當區區議員姚國威指,天秀墟人流疏落非一朝一夕,不少檔販曾反映經營困難,部分更言明約滿後將離場。

立法會扶貧小組委員會委員郭偉強表示,現時社會企業資源有限,加上需自負盈虧,可用資源十分有限。郭建議政府應吸取教訓,日後加強支援,「政府話要幫基層就業就要畀多啲支援,唔係話批塊地出嚟就由得佢哋!好多時唔係營運機構唔肯解決問題,而係冇足夠嘅資源。」

記者:楊育輝、呂耀焜

第一手消息請下載on.cc東網iPhone/iPad/Android/Windows Phone Apps