政情：梁劉柔芬鍾情厚多士
尋日下午兩點半鐘，我哋喺灣仔聖佛蘭士街嗰頭嘅進教圍，遇到立法會前議員梁劉柔芬（Sophie）同一位女性朋友喺茶檔入面歎茶。原來Sophie間中就會去嗰度同朋友食多士、飲港式奶茶，佢話自己公司喺附近，所以會搜尋吓附近嘅特色店舖。
不過，Sophie唔單止鍾意特色店舖，佢食嗰塊厚多士都非常特別，似係麵包皮製作嘅多士。Sophie話，咁係因為佢覺得呢啲麵包皮冇人鍾意食，最終都會被棄掉，所以為免浪費，佢會專登柯打麵包皮多士，仲叫老闆收番正價添，因為始終做生意燈油火蠟都要成本喎，真係夠晒環保。
（徐家浩攝）