政情：克勤抽靚籤歎足兩年
立法會十月復會後，隨即會上演「三堆一爐」拉布戰，再加上能源組合檢討、機場第三條跑道環評報告等，環境局局長黃錦星肯定有排煩。不過，有熟悉環保問題嘅政界人士就預言，立法會環境事務委員會（環委會）未來兩年會無風無浪、平平淡淡，皆因上述環保政策議題，有啲早已過咗環委會嗰關，轉咗手畀財務委員會，有啲就根本唔屬於環委會職責範圍。將於未來兩年接掌環委會主席一職嘅陳克勤，肯定唔使好似財委會主席吳亮星咁，畀班委員集體舉紅牌抗議。
「三堆一爐」已提上財會
立法會放暑假前，多項由環境局負責嘅政策或撥款接連遇到挫折，須於復會後慢慢執手尾，包括畀新界東北撥款拉布戰拖垮嘅「三堆一爐」撥款，以及意外地遭終止待續甚至否決嘅小蠔灣廚餘回收中心及活化已復修堆填區計劃，但呢三項議題一係就已提上財委會等待最後一次表決，一係就純粹因為當局唔記得「吹雞」召集建制派投票，先令泛民主派成功突襲，最後遲早都會重新獲得通過。
除咗呢三項舊議題，環境局未來兩年仲有三項頗為棘手嘅新議題排住隊上立法會，當中最大鑊嘅係能源組合檢討，因為同時涉及係咪向內地買電及增加核電發電比例、將來電費會否提高或降低、仲有本地兩大電力公司嘅利潤問題，非常複雜且具爭議性。第二項係機場第三跑道工程對附近環境、尤其係對中華白海豚生態嘅影響，複雜程度唔輸得過能源組合檢討。最後一項就係有關收緊外來船隻來港泊岸時嘅廢氣排放限制，同樣牽涉唔少商業利益，一樣咁難搞。
就算參與只係做配角
不過，呢三項議題都有一個共通點，就係雖然環境局有份負責，但係喺立法會層面，就分別屬於經濟發展委員會或交通事務委員會嘅職責範圍，環委會隨時完全唔使參與，就算要參與都係做吓配角，例如幫手搞吓聯席會議同邀請啲相關環保團體畀意見等，總之克勤仔今次就抽到支好籤喇！