政情：公民講場：有冇「黎」捐款 佔中：唔肯定

壹傳媒老闆黎智英（肥佬黎）一直大力支持「佔領中環」行動，又向過佔中之三子之一嘅朱耀明捐款，但朱耀明就話佢係代其他團體收取肥佬黎錢，唔關佔中事。佔中發起人戴耀廷尋日被問及有關問題時，直認曾經同肥佬黎接觸傾佔中，但係「喺我個認知入面」係冇收過署名「黎智英」或者佢助手「Mark Simon」嘅錢。不過佢同時表示，佔中過去收到過唔少來自「無名氏」嘅捐款，佢唔肯定呢啲「無名氏」係咪即係肥佬黎。肥佬黎捐錢向來都鬼祟，究竟佢有冇化名「無名氏」向佔中科水，真係得佢自己先知。