政情：八網難逃：譚文豪妻誕龍鳳B 「方便又快捷」

踏入暑假，政界喜事重重，日前有新民黨副主席田北辰抱龍鳳孫，尋日又有政壇飛機師譚文豪（Jeremy）太太誕下龍鳳B。Jeremy尋日喺社交網站公布喜訊，話BB女有五點七磅重，而細佬更有成六點九磅，以雙胞胎嚟計算係重磅。佢講笑話如果要為香港出生率出一分力，生孖胎係一個既方便又快捷嘅做法喎！Jeremy引述醫生話，佗龍鳳B會有早產風險，所以佢同太太初時都好擔心，驚BB會搶閘早產出世，好彩最後有驚無險。為咗照顧一對BB，Jeremy話自己早已請定陪月工人，並會請長假暫時唔周圍飛住，到八月中先復工，準備晚晚唔瞓湊BB。