政情：愛迪生發明電燈 林超英最憎
好多人都趁住書展熱潮出書，天文台前台長林超英亦唔例外，崇尚自然嘅佢尋日喺會展舉行新書發布會時，講到可持續發展同資源愈來愈少嘅問題，佢話人類應該要返璞歸真，節約用水用電，先可以減低對地球嘅破壞。佢仲話自己最憎愛迪生發明電燈出嚟，原本人類日出而作日入而息嘅生活習慣徹底改變，搞到佢依家夜晚都要工作喎！
自細就對天文同科學充滿興趣嘅林超英話，自己已經唔再相信科學可以解決環保問題，反而只會製造更多問題。佢仲提出，好多現時社會嘅議題，根本係「假問題」，好似郊野公園根本唔會解決到平民嘅住屋需要咁，因地方偏遠、交通唔方便、冇鄰近就業機會，最終只適合興建別墅，對平民住屋情況冇改善。
「跑道非飽和 僅管理不善」
林超英仲非常反對機場起第三條跑道，佢指不存在跑道飽和嘅問題，純粹係管理不善，賤賣time slot（飛機起降時間），任由航空公司將一班大機拆分成多班細航班引致，而第三條跑道實際運作上會與第二條跑道重疊，故根本不能改善問題。