政情:李漢奸 民主阿婆連捱三巴掌

外號「李漢奸」嘅民主黨創黨主席李柱銘同「民主阿婆」前政務司司長陳方安生,前日結束訪問英國「唱衰」香港之旅,二人死撐此行非自取其辱,但事實擺在眼前,先喺英國國會外交事務委員會聽證會上被當地議員噴到一面屁,而英國政壇專用智庫駐港高級研究員最新評論報告亦隔空反駁兩人嘅歪理,尋日到歐盟「接力」發表聲明表態摑李漢奸同民主阿婆一巴,強調要喺「一國兩制」框架下就政改達成共識,話時話依家好多歐美國家都排住隊向中國「錢」攞着數,但李漢奸同民主阿婆仲昧於形勢,只會進一步畀人唾棄!

中國與歐洲大把生意

歐盟最新聲明談及香港二○一七年特首普選,指留意到香港特首本月十五日公布嘅政改報告,歡迎關乎一七年特首普選開始啟動政改五部曲程序,強調歐盟會密切留意最新進展,希望各方可以喺「一國兩制」框架下達成共識。

今次歐盟表態摑「唱衰」香港二人組李漢奸同民主阿婆,有人話其實係「有錢使得鬼推磨」,國家領導人今年四月訪問歐洲時又簽署百多個合作協議,其中到訪歐盟總部後,雙方聯合聲明同意從長遠睇,喺條件成熟時簽訂全面深入自由貿易協定,有分析指涉及嘅銀碼以百億元計,因此歐盟嘅表態,其實係明示暗示民主阿婆同李漢奸唔好喺度阻頭阻勢。

事實上,歷史總係不斷重複,李漢奸同民主阿婆早前訪英碰得一面灰,就係適逢國家領導人早前先去完英國簽訂一份價值二千三百億港元嘅採購合同,據聞依家好多歐美國家都排住隊向中國「錢」攞着數,李漢奸同民主阿婆再阻頭阻勢,遲早被人當係「透明」,不如早啲自我摺埋啦。

親中派斥二人係罪孽

李漢奸同民主阿婆在外深受冷落,香港親中陣營也睇唔過眼狠批二人勾結外國勢力行為。

工業界立法會議員林大輝喺立法會不點名批評李漢奸同民主阿婆二人,話佢哋接二連三到英美等國搖尾乞憐,形容有關人士係「衰人」,借外國勢力干預係大錯特錯、「罪孽」。李漢奸同民主阿婆接連被摑又被鬧到體無完膚,講到底都係自找,唔值得可憐!

第一手消息請下載on.cc東網iPhone/iPad/Android/Windows Phone Apps