中環出更：佳叔以伊拉克喻中港矛盾
向來語出驚人嘅中央政策組前首席顧問劉兆佳（佳叔），過去兩年都有出書講政治局勢，今年書展都唔例外，尋日佢舉行新書發布會。唔知係咪佳叔見到咁多讀者捧場，講嘢特別放，當佢講到中港關係及佔領中環（佔中）時，竟分別用伊拉克庫爾德族人及古巴導彈危機做比喻，真係估佢唔到。
古巴導彈危機論佔中
佳叔話，現時港人反抗中央情緒日漸高漲，就好似喺伊拉克嘅庫爾德族人要有自己國家，唔要由伊拉克政府統治一樣，仲話雙方一日唔放低分歧、矛盾，問題好難解決。嘩，當年伊拉克為咗維穩，向庫爾德族人放毒氣彈，殺咗幾千人，唔通佳叔預料香港都有呢一日？
講到咁激，台下讀者依然無乜反應，到有人問佳叔點睇佔中時，佳叔就再引用另一經典例子，話六十年代冷戰，美蘇兩大陣營爆出古巴導彈危機，但危機過後，反而令兩大陣營關係緩和，所以就算佔中出現流血衝突，香港社會都承受到。當年佳叔以錯判形勢見稱，好似○三年七一遊行，佢以為得幾萬人，點知結果有五十萬人，今次佢講嘅嘢，信不信由你喇！
卓妮