政情：公民講場：為慳「光陰」阿王收口

立法會財務委員會尋日終於完晒「馬拉松」式會議，但最後一次會就要「開行油」直踩八小時處理三十幾項撥款申請。向來口水多、金句亦多嘅王國興（阿王），早幾日為咗反對財委會向「拉布」議員「跪低」調動議程，先揚言唔介意日以繼夜、夜以繼日開會抗衡，但話口未完，尋日朝早復會冇幾耐，阿王就主動提出會支持政府餘下所有撥款申請，因為剩番落嚟嘅時間唔係「一寸光陰一寸金」，而係「一寸光陰一『呎』金」，為慳番審議時間，叫政府官員唔使答佢問題喇。而佢就真係幾乎封咀，甘願坐定定做投票機器，快啲完會放暑假。