政改首階段諮詢報告下周二出爐，喺呢個政局敏感時刻，「搞事四人幫」又出動，其中「民主阿婆」政務司前司長陳方安生近日除咗動作多多外，更加再度夥拍外號「李漢奸」嘅民主黨創黨主席李柱銘出訪英國「唱衰」香港，更向報章承認去當地係「反映香港民意」。
民主阿婆近日多次抱怨英國作為香港前宗主國，對香港事務「失聲」，唔知今次訪英係咪想用盡自己作為港英餘孽嘅人情牌，乞求英方為香港政改出句聲呢？
民主阿婆同李漢奸四月曾出訪美加，更「湊巧」獲美國副總統拜登接見，輿論隨即批評二人「唱衰」香港。話口未完，二人今日會再啟程前往英國訪問一星期，聲稱係應當地智庫「皇家國際事務研究所」（The Royal Institute of International Affairs）邀請，到當地反映香港人對真普選嘅訴求喎，講得白啲即係希望英國可以就香港政改向中央施壓囉！
不過，英政府前日先發表香港半年報告書，表明「一國兩制」原則運作良好，《中英聯合聲明》同《基本法》承諾嘅權利及自由都繼續得到尊重。究竟民主阿婆同李漢奸仲有咩想向英國乞求呢？