中環出更：投資跑輸大市 立會有「燈神」？
立法會同政府一樣，都會動用儲備投資，防止資本被通脹蠶食，但立法會最新一年嘅投資成績，就追唔上通脹速度。話說立法會去年投資收益都有五百多萬元，但今年就跌至二百幾萬，如果按可用儲備一億元計算，即係投資回報唔夠百分之三。聽聞立法會議員之中嘅四大投資高手都有畀投資意見，但都係賺咁少，唔通佢哋做咗「燈神」？
用納稅人錢 採保守策略
立法會投資顧問小組成員包括金融服務界張華峰、工業界梁君彥、保險界陳健波及金融界吳亮星，照計佢哋收盡股壇最新消息，點解會咁失威先？有小組成員解釋，以佢哋眼光，肯定唔只賺咁少，但佢哋用緊納稅人嘅錢，就一定要謹慎保守。原來一億元儲備有近八成用喺定期、債券等低風險投資工具，股票只係佔兩成，有成員認為可以增加股票投資比例，但可惜佢哋冇最終決定權。
一年得二百幾萬回報已經算少，點知轉個頭就冇咗一成。立法會行政管理委員會尋日已決定用咗二十萬委託顧問公司做保安報告，睇吓將來點樣完善保安安排。此外，因為立法會法律顧問馬耀添明年退休，又要使錢搵獵頭公司公開招聘，目的係希望年底前請到合適人選。以咁嘅情況，立法會遲早入不敷支。
卓妮