中環出更：馮國綸血拼 太太做指導
夏日熱辣辣，唔想出街流汗嘅就最啱逛商場歎冷氣「濕平」，利豐集團主席馮國綸（William）周日就同太太拍住拖行中環ifc商場。唔好以為購物係女士專利，原來當日要「出血」嘅係William，二人抵達商場後就直入頂樓嘅高級百貨公司男裝部，馮太除咗樂意做跟得夫人外，仲時裝指導上身全程傍住老公揀衫、試衫，仲兼任埋財政大臣負責畀錢添！
馮氏夫婦向以恩愛見稱，卓妮前年亦撞過二人孖住行ifc，到公司旗下代理嘅西裝品牌巡視業務。不過，今次卓妮就見馮氏冇向自家代理品牌埋手，而係專攻其他歐洲品牌。
揀衫驗料 仔細把關
佢哋先殺入男裝部，一埋位就相當有默契咁各自揀衫，馮太熟悉William嘅時裝品味，充當私人時裝指導幫老公揀衫，睇見馮太每攞件貨上手，都巨細無遺咁摸清楚啲質地同車工，而且必定睇清楚價錢，認真精打細算。
William多年來鍾情淺色系服飾，今次亦唔例外，先係試咗條白色長褲，據知呢條褲係來自意大利嘅高級時裝品牌，索價要四千多元，可惜發覺唔係好啱身，惟有忍痛放棄。William公司有份主理高級時裝，所以分屬「行家」，好快又揀咗件比利時嘅長袖白色恤衫着上身，跟得太太隨即由膊位、袖口位仔細檢查一次，發現啱心水先入手。
不過，William揀啱後並冇走去畀錢，反而坐喺店內「印印腳」睇時裝目錄，原來佢太太負責付款，難怪佢可以咁「梳乎」慢慢歎喇！二人逗留約半個鐘就手拖手離開。
卓妮