免被同學歧視 獲父親體諒
多項民調都顯示，依家啲八、九十後青年，十居其九都係反政府、反建制。尤其係喺網上世界，青年人對建制派同功能界別議員嘅批評可以非常惡毒，經常連佢哋嘅父母、子女都問候埋。有建制派功能界別議員就透露，自己喺本港讀緊大學嘅囝囝，本身並非唔認同爸爸嘅政治立場或工作，但為免畀啲大部分屬激進派嘅九十後同學歧視，搞到自己冇晒朋友，甚至被網上欺凌，囝囝喺校內一直對自己嘅「身世」三緘其口，甚至同爸爸一齊出街亦要相當小心，費事畀啲同學認到，真係慘情。
不過，呢位議員爸爸都好體諒個仔，明白對方咁做只想保護自己，唔會覺得個仔不孝，甚至某程度支持對方咁做，以免自招麻煩同連累其他家人。