政情：沈祖堯嘆：香港好陌生
最近香港政局立立亂，中文大學校長沈祖堯尋日在社交網站個人專頁留言，「I feel that I don't know this place anymore. 」此言一出，即刻引起各界揣測。點解沈校長覺得唔再認識香港呢個地方？咁啱前日立法會財務委員會喺爭議聲中通過新界東北發展前期工程撥款，莫非沈校長有感而發？咁佢究竟係感嘆建制派強行表決通過，抑或感慨泛民議員冇晒規矩呢？
唔認同暴力衝擊立會
我哋趁沈校長尋日下午出席活動時同佢問個清楚，佢話，其實係見到議會內嘅衝突，先至有咁嘅感受。至於究竟係財委會主席吳亮星定係泛民嘅行為令佢感慨留言，佢就唔答喇！唔知佢對議會外嘅衝擊又點睇呢？沈校長話，明白青年人可能希望為弱勢社群發聲，但絕對唔認同用暴力衝擊立法會，因為抗爭手法應該係和平、理性咁話喎。