中環出更：「茅台」女青委 食飯打底防醉
成班朋友聚埋一齊，有三兩杯落肚氣氛特別高漲，但點樣先可以冇咁容易飲醉呢？香港國酒茅台之友協會青年委員會日前舉辦分享會暨晚宴，一班識欣賞杯中物嘅成員，探討完國酒嘅歷史文化之後，當然要搞番個品嘗環節啦！卓妮見會上一眾女成員由頭飲到落尾，面不改容，冇絲毫醉意，原來佢哋係靠食飽飯打底，而過往飲醉酒嘅慘痛經歷亦成為佢哋嘅鍛煉過程。
晚宴一開始，卓妮見一眾女成員迅速食飯，莫非好餓？青委顏明秀就話，呢啲場合最緊要咩都唔好理，食咗飯先，愈多澱粉質愈好，好似飯呀、饅頭咁就最着數喇，始終有食物打底先飲酒冇咁易醉同傷身。同場嘅青委劉子芸（Vanessa）亦所見略同，講起最難忘嘅醉酒經歷，就係有次中午就開始飲三十年茅台，結果嘔足大半日，所以依家學精咗食飽飯先飲酒喇！
青委周雯玲就較少出現呢種情況，事關佢接觸婦女團體居多，飲酒相對節制。至於第一批去茅台廠參觀嘅青委柯家洋就仲搞笑，去之前因為驗到有幽門螺旋菌要住院，臨時獲批准出院後就馬上去飲茅台，飲飲吓仲完全唔記得咗自己有病，龍精虎猛，唔通茅台酒連啲菌都殺死埋？不過，帶病飲酒傷身，大家唔好亂學呀。
「投資茅台好過買藍籌」
班青委都咁飲得，好似主任莊家彬、顧問吳永嘉及楊華勇呢啲更加「成精」，再老一輩嘅協會監事長楊孫西已成「酒仙」級數。楊孫西就喺晚宴中分享投資茅台攻略，話買新茅台擺幾年好過買有年份嘅茅台，皆因五、六十年代嘅茅台瓶身物料設計未完善，瓶內嘅酒容易揮發，而新茅台品質就統一好多，目前趁低吸納仲好過買藍籌股喎！
卓妮