俗語話，太公分豬肉，人人有份。其實，特區政府授勳都係差唔多嘅咋，好似港英時代作為特權象徵嘅太平紳士咁吖，唔止淪為分餅仔嘅政治酬庸工具，仲染成一片紅，搞到不倫不類，笑話百出。

嗱，本身係山東人嘅華潤集團前董事長兼黨委書記宋林，去年七一先至獲港府委任為太平紳士，點知相隔幾個月就因為涉嫌違紀而被中紀委宣布免職調查，唔止係笑話，簡直係鬧劇。仲有吖，宋林除咗係太平紳士，仲係廉政公署道德發展諮詢委員會主席添，「腐敗分子反腐敗」，問你服未！

提起太平紳士，好多人只會諗到巡視監獄以及每星期三日上電視監察六合彩攪珠，其實，當初嘅太平紳士好巴閉，幾乎等於現時嘅暫委法官，職責包括協助維持社會秩序、為華洋居民調解糾紛、防止非法刑罰、處理簡單嘅法律程序等等，可惜，經過逾一百七十年嘅演變，現時嘅太平紳士制度烏煙瘴氣，已經今非昔比咯。就以宋林為例吖，一個共產黨高官居然成為極具殖民地色彩嘅太平紳士，你話成何體統？如果英女王畀個爵士銜頭佢，唔通佢都接受咯喎？正所謂，國有國法，黨有黨紀，家有家規，共產黨員應該堅守信仰至係，正如佛教徒食齋、回教徒唔食豬肉咁，點可以來者不拒呢！

講開又講，港府將授勳變成利益輸送工具，都唔係一朝一夕嘅事咯，尤其係貪曾禍港七年期間，年年授勳都幾乎變成「曾朋友」嘅年度聚會，連「三點不露」臭名遠播嘅李國寶都獲頒最高殊榮大紫荊，佢兩個仔李民橋及李民斌亦罕有地先後獲委任為太平紳士，何德何能吖？有人話內地嘅政協藏污納垢，其實香港嘅授勳制度亦不遑多讓，可以講係五十步笑一百步。

最離譜嘅係，現行太平紳士制度並無規定獲委任者須為香港居民，而法例訂明嘅居港限制亦一直冇被執行，搞到愈來愈多好似宋林咁樣背景嘅內地人獲委為太平紳士，佢哋對香港既冇貢獻，更講唔上忠誠，究竟有乜嘢資格做太平紳士，當局又根據乜嘢準則委任，一切都係黑箱作業。唔講唔知，截至今年三月底，太平紳士達到一千五百幾人，講得好聽叫陣容鼎盛，講得難聽根本就係濫竽充數。咁又難怪嘅，太公分豬肉喎，太平紳士始終係身份及地位嘅象徵，權貴又點可能唔趨之若鶩吖。

呢嗱，七一就快到喇，又係特區政府分豬肉嘅時候，睇吓今次又有幾多權貴錦上添花。咪話功夫茶唔提醒，分豬肉還分豬肉，千祈唔好重演好似宋林咁嘅鬧劇吖！