近日國務院推出關於「一國兩制」嘅白皮書，令政改形勢再次變得劍拔弩張。呢個時候，一班溫和派就打正旗號成立「香港政改民意關注組」，十五名成員包括立法會前議員李華明（肥仔明）等三名白鴿黨成員、前新聞統籌專員何安達及大律師李律仁等，真係建制、泛民都齊晒腳。
關注組話想以民意調查為基礎討論政改，睇埋佢哋尋日公布嘅民調，訪問咗一千人，話有五成四人支持就算不滿意提名程序，都想「食住先」，達至一人一票選舉特首，當中報稱泛民嘅人，支持率仲高過建制派三個百分點，唔通佢哋都想畀雙方有個下台階，通過政改方案？
據聞其中幾名成員呢三個月食飯傾偈時，有共同意願從民調出發，咁樣就「一個拉一個」組成關注組。事前何安達重申，佢哋只以個人名義加入，每人「科水」幾千元搵嶺南大學做民調。肥仔明話，佢哋估計會喺八月，即係人大常委會就政改作決定前再做民調喎。